आज स्वातंत्र्यदिन आहे.......

आज स्वातंत्र्यदिन आहे.......

लगबगीने आज मुद्दामहून लवकर उठलोय...
१० वाजता विद्यापीठात ध्वजारोहण आहे. १० वाजता?? हो !
लहान असताना ध्वजारोहण म्हणजे, सकाळी बरोबर ७ वाजता होणार अस समीकरण असायचं.त्यासाठी पहाटे ५ वाजताच सगळ घर जाग व्हायचं...खादीचा नेहरू शर्ट आणि गांधी टोपी कडक इस्तरी करून,नटून-खटून  जायचो....असा सगळा इतिहास(??) मनात तरळून जातोय......
असो,लगबगीन आता तयार झालोय आणि विद्यापीठाकडे निघालोय....घरापासून बस पकडण्यासाठी १-१.५ किलोमीटर बुद्ध कॉलनीपर्यंत चालत जाव लागतंय ..त्या दिशेने रस्ता तुडवीत,कालच्या पावसाने तुंबलेले खड्डे चुकवत चुकवत चाललोय...
आज स्वातंत्र्यदिन आहे......

जाणारा रस्ता हा कैकाडी वस्तीतून जातोय....लहान मुल हातात तिरंगा झेंडा घेऊन बागडताना दिसतायेत,जीर्ण झालेला एक म्हतारा नळाला पाणी आलंय म्हणून रस्त्यात अंघोळीला बसलाय...पाणी माझ्या शुभ्र कपड्यावर उडू नये म्हणून मी खिलाडू वृत्तीने स्वतःला वाचावतोय...आज स्वातंत्रदिन आहे........

मी हळूहळू कैकाडी वस्तीतून वाट काढतोय...डाव्या हाताला मरीआईच छोटस मंदिर लागलंय...मंदिराच्या ओट्यावर छोटासा टेप रेकोर्डर ठेवलाय त्यावर गाण चालूये...सारे जहां से अच्छा,हिंदूस्ता हमारा....पुढेच एक झेंडा एका पाणी साठलेल्या  खड्ड्यात पडलेला आहे,तो उचललाय आणि काय करायचं याचं??  या यक्षप्रश्नाच्या नादी न लागता तसाच तो फाटलेला झेंडा खिशात ठेवलाय.....आज स्वातंत्रदिन आहे...........

मी आता वस्तीतून बाहेर हाय-वे ला आलोय,वस्तीच्या बाहेर १०-१२ वर्षाची लहान मुले हातात शर्टला लावण्यासाठीचा झेंडा घेऊन उभी आहेत,काका हा झेंडा घ्या न म्हणत,काही कळायच्या आत त्यांनी माझ्या शर्टाला झेंडा टाचणीने टोचायला सुरुवात केलीये,मी त्यांना म्हणतोय अरे बाळ सुट्टे पैसे नाहीत माझ्याकडे....ते म्हणतायेत काका २ रुपये दिले तरी चालतील...मी म्हणतोय अरे सुटते नाहीच आहेत ,१०० ची नोट आहे...
मुलगा बारीक तोंड करतोय आणि आता पर्यंत अर्धी टोचलेली टाचणी खपकन ओढून घेतोय..आणि काय काका तुम्ही पण....असं म्हणत मागून येणाऱ्या माणसाकडे वळतोय....मी मात्र माझ्या ब्रांडेड शर्टाला भोक तर पडलं नाही ना म्हणून तपासून बघतोय....आज स्वातंत्र्यदिन आहे......

मी आता बसस्टोप वर पोहोचलोय....एव्हाना धो धो गर्दी करत वाहणारी बस आज निवांत आलीये...रिकाम्या बस मध्ये मी चौथा माणूस चढलोय....रोज ३०-३५ मिनिटाचा प्रवास आज १० मिनिटात संपलाय कारण आज ट्राफिक नाहीये....
आज स्वातंत्रदिन आहे......

विद्यापीठात पोहोचतोय....कुलगुरू साहेब अजून आलेले नाहीत.लोक कोवळ्या उन्हात ताटकळत उभे आहेत.थोड्या कालावधीने कुलगुरू आलेत.झेंड्याला मानवंदना दिली गेलीये....तालासुरात राष्ट्रगीत म्हटलं जातंय......झेंडा आसमंतात फडफडतोय .आज तिरंगा भलताच देखणा दिसतोय......कुलगुरू आता भाषण करतायेत.सभागृहात बसायला जागा नाहीये,म्हणून आम्हाला शेजारच्या वर्गात बसवलंय आणि तिथेच पडद्यावर सभागृहात काय चालू आहे हे थेट प्रक्षेपानाद्वारे दाखवलं जातंय...आज स्वातंत्रदिन आहे....

कुलगुरू आज दिलखुलास आहेत,त्यांच्या कारकिर्दीतल हे शेवटच भाषण आहे,पुढच्या स्वातंत्रदिनी ते निवृत्त झालेले असणार आहेत....रटाळगप्पा ऐकून आता मी बोअर झालोय...वसतिगृहाच्या वाचन कक्षात पेपर वाचायला बसलोय...हातात महाराष्ट्र टाईम्स आलाय...रिलायंस ट्रेंड ची जाहिरात दिसलीये..१९४७ रुपयांच्या कपडे खरेदीवर १९४७ ची खरेदी मोफत......
मी जाम खुश आहे...भावाला फोन करून सांगितलंय,तो म्हणतोय लवकर घरी ये जाऊयात आपण...मी पेपर ठेवून दिलाय आणि घाईघाईत आता रिक्षा पकडून  खरेदीला निघालोय.....
आज स्वातंत्रदिन आहे.....